Kapitalismo liberalaren erakundeak, adibidez, Nazioarteko Moneta Fondoa (IMF) edo Mundu Merkataritza Erakundea (WTO) biltzen diren bakoitzean, hiri berean globalizazioaren kontrako manifestazio itzelak egoten dira. Zein da talde hauen ideologia eta zein helburu lortu nahi dute? Atal honetan galdera honi erantzuten saiatuko gara.

Merkataritza libreak garatzeko aukera ezin hobea ekar diezaieke herrialde atzeratuei. Bere kostu baxuei esker herrialde garatuak baino lehiakorragoak dira. Batez ere laneskua merkea eta aski formatua baldin badute, Europa ekialdeko herrialdeak bezala. Baina, liberalismoa hainbeste aldarrikatzen duten nazio garatuak izaten dira lehenak euren merkatuak babesten herrialde txiroetako produktuen aurrean.

Multinazionaleen inbertsioek aberastasuna sortzen dute nazio azpigaratuetan, baina herri hauen araudi laboralek laneskuaren esplotazioa baimentzen dute askotan, eta sortutako balioerantsiaren zati txiki bat besterik ez da gelditzen bertan.

Kapital mugimendu espekulatiboek, ordea, moneta krisi latzak eragin ditzakete ekonomia ahuletan, hala nola, Mexiko, Tailandia, Argentina edo Turkia. Espekulazioak mesfidantza eta globalizazioaren kontrako erreakzioak piztu ditu.

Migrazioak arazoak sortzen ditu etorkinak jasotzen dituen herrian, baina herri hauek lanesku honen beharra dute bere ekoizpen sistemarako.

Komunikabideen garapenak eredu kultural amerikarra esportatzen duen era berean, globalizazioaren kontra borrokatzeko tresna bihurtu da, internet izaten baita mugimendu hauen koordinazio modua.

Globalizazioa fenomeno konplexua da, beraz. Abantailak eta arriskuak ekartzen ditu eta liberalismoaren doktrina zabaltzen duen bezalaxe, kontrako borroka ahalbidetzen du.

Joan zaitez ATTAC erakundearen web orrira eta bila itzazu globalizazioaren kontrako arrazoiak eta leloak.